Rusiyadan gələn silahlar Respublikanın Baş naziri Narendra Modinin Müstəqillik Günündə elan etdiyi yeni irimiqyaslı hava hücumundan müdafiə sisteminin bir hissəsi ola bilər. Bunu Rusiyanın Hindistandakı müvəqqəti işlər vəkili Roman Babuşkin keçirdiyi mətbuat konfransında deyib.
Diplomat xatırladıb ki, Rusiyanın S-400 zenit-raket kompleksi Sindoor əməliyyatı zamanı döyüş şəraitində uğurla sınaqdan keçirilib. “Bu silahlar təbii olaraq artıq Hindistanın hava hücumundan müdafiə sistemlərinin bir hissəsidir. Ona görə də biz belə başa düşürük ki, bu sistemlərin təkmilləşdirilməsindən söhbət gedəndə Rusiya texnikası da bu prosesin bir hissəsi olacaq”.
“Rusiya Hindistanı öz səylərində dəstəkləməyə hazırdır”, – deyə Babuşkin iki ölkə arasında müdafiə sahəsində əməkdaşlıqdan danışıb. “Rusiya ölkənin müdafiə potensialının inkişafında Hindistanın aparıcı tərəfdaşıdır. Biz müxtəlif, o cümlədən kompleks avadanlıqların birgə istehsalı proqramını xeyli genişləndirmişik”, – deyə o, qırıcılar üçün reaktiv mühərriklərin yaradılmasının onun tərkib hissəsi olduğunu vurğulayıb. “Bu, bu əməkdaşlığın daha da genişləndirilməsi və inkişafı istiqamətində atılan addımlardan sadəcə biridir”, – o bildirib. (Tass)