Sevgi və şəfqətin, inam və etibarın ünvanı, mənəvi dəyərlər və müasirliyin vəhdətindən yoğrulan bütöv şəxsiyyət, dinamik fəaliyyət və davamlı uğurun zərif siması – Mehriban xanım Əliyevadır. O, ictimai və sosial fəaliyyətinin məqsədləri, qərarlarında insan talelərini önə çəkməsi, qadınlara və gənclərə ötürdüyü mesajı ilə sübut edir ki, qadın zərifliyi və lider qətiyyəti bir yerdə olanda, təsir dairəsi daha geniş, nəticələr daha dərin olur.
Bu sözləri Teleqraf-a Ailə, Qadın və Uşaq Problemləri üzrə Dövlət Komitəsinin sədri Bahar Muradova deyib.
Komitə sədrinin fikrincə, Mehriban xanım Əliyeva hər gün sübut etməkdədir ki, qadınlar milli dəyərlərə, ailə institutuna, cəmiyyətin inkişafına söykənəndə daha böyük hədəflərə çata və dövlət idarəçiliyində daha mühüm rol oynaya bilərlər: “Onun birinci vitse-prezident kimi xidmətinin məzmununu-təkcə sosial, təhsil, səhiyyə və mədəniyyət sahələrinə sistemli dəstək deyil, həm də Azərbaycan qadınının dövlət siyasətində real və təsirli iştirakının mümkünlüyünü yaşanmış nümunəyə çevirməsidir.
Bu gün ailə, cəmiyyət və dövlət üçlüyündə öz həlledici yerini almaq istəyən hər bir Azərbaycan qadını onun timsalında özünü görür. Bu zəhmətkeş və ağıllı, duyğulu və müdriklik təcəssümüdür”.
Bahar Muradova vurğulayıb ki, Mehriban xanım Əliyevanın yorulmaz fəaliyyəti təkcə ötən illərin konkret və danılmaz nəticələri ilə deyil, həm də gələcək onilliklərin aydın hədəfləri ilə ölçülür: “O, bizim hamımızı sadəcə təmsil etmir, dəyişdirir, gücləndirir, ruh verir, bütün qadınlar üçün həm ilham, həm də inam mənbəyi olur. Fədakar ömrü dəyərlər üzərində qurulmuş bir uğur hekayəsi olan möhtəşəm xanım, doğum gününüz mübarək olsun”.