Pakistan Daxili İşlər Nazirliyi yerli hakimiyyət orqanlarına ABŞ-a köçmək üçün sənədləşməni gözləyən əfqan qaçqınların saxlanmasını qadağan edən bildiriş göndərib. Bu barədə The Express Tribune qəzeti məlumat yayıb.
Daxili siyasət departamentinin məktubunda deyilir: “Siyahıda adı çəkilən Əfqanıstan vətəndaşlarının növbəti xəbərdarlıq edilənədək həbs edilməməsinə diqqət yetirin. Amerika səfirliyinin məlumatına görə, 1150 Əfqanıstan vətəndaşı ABŞ-da məskunlaşmaq üçün himayə olunur”.
Bu tədbir Vaşinqtonun İslamabada müraciətindən sonra qəbul edilib. Dövlət Departamentinin sözçüsü Metyu Miller deyib: “Biz Əfqanıstanın qonşularını, o cümlədən Pakistanı beynəlxalq himayə istəyən əfqanlara girişə icazə verməyə və humanitar yardım göstərmək üçün beynəlxalq təşkilatlarla koordinasiya etməyə çağırırıq”.
Oktyabrın 31-də Pakistandan bütün sənədsiz əcnəbi mühacirlərin könüllü getməsi üçün verilən son tarix başa çatdıqdan sonra Pakistan hakimiyyəti onları mərhələli şəkildə deportasiya etmək üçün saxlamağa başlayıb. Oktyabrın əvvəlindən 180 mindən çox insan Pakistandan Əfqanıstana qayıdıb. (Tass)