Estoniya Müdafiə Qüvvələri hava məkanının pozulmasına cavab tədbirləri həyata keçirmək üçün plandankənar təlimlərə başlayıb. Dövlət yayımı ERR xəbər verir ki, manevrlərə Rusiya pilotsuz təyyarələrinin Polşa hava məkanını pozması səbəb olub.
Təlimlər zamanı hərbi qulluqçular radarlardan istifadə etməklə hava vəziyyətini izləyəcəklər. Ölkənin şərqində təyyarələrin uçuşları müvəqqəti məhdudlaşdırılacaq, hava hücumundan müdafiə bölmələri yüksək hazırlıq vəziyyətinə gətiriləcək. Hərbi qulluqçular və “Kaitseliit” adlı könüllü hərbiləşdirilmiş dəstənin üzvləri üçün paralel təlimlər keçirilir.
Eyni zamanda, Estoniya Müdafiə Qüvvələri Komandanlığı hazırda ölkə üçün heç bir təhlükənin olmadığını bəyan edib. (Tass)