Avropa Komissiyasının sədri Ursula fon der Leyen bəyan edib ki, Avropa İttifaqı ölkələri ABŞ prezidenti Donald Trampın Qəzza zolağında münaqişənin həlli planının həyata keçirilməsində iştirak etməyə hazırdır.
“Mən Trampın Yaxın Şərqdəki müharibəni həll etmək planını alqışlayıram. Hər kəsi bu planda fəal iştirak etməyə çağırıram. Aİ onun həyata keçirilməsinə töhfə verməyə hazırdır”, – AK rəhbəri X-də yazıb. O, həmçinin əlavə edib ki, Qəzza münaqişəsinin iki dövlətli həlli regionda sülhü təmin etmək üçün “yeganə əlverişli variant” olaraq qalır.
Avropa Şurasının sədri Antonio Kosta və Avropa Parlamentinin sədri Roberta Metsola Avropa Komissiyasının mövqeyini dəstəkləyiblər. Metsola həmçinin X-də yazıb ki, ABŞ administrasiyasının təqdim etdiyi plan “nəsillər boyu davam edən qan tökülməsinə, terrora və vəhşiliyə son verə bilər”. O qeyd edib ki, plan “əbədi müharibəyə aydın alternativdir”. (Tass)