Oktyabrın 9-da Rusiyanın Krasnoyarsk Regional Xüsusi Kitabxanasında rus şairi və yazıçısı, Azərbaycan və Rusiya Yazıçılar birliklərinin fəxri üzvü, Ümumdünya Yazıçılar Təşkilatının (WOW) Əlaqələndirmə Şurasının rəhbəri Eldar Əhədovun yaradıcılıq axşamı keçiriləcək.
AZƏRTAC xəbər verir ki, Eldar Əhədov Rus Coğrafiya Cəmiyyətinin üzvüdür. Onun yaradıcılığına 100-ə yaxın nəsr, poeziya, ədəbiyyat, tarix və toponimik tədqiqatlar daxildir. Ədibin kitabları Azərbaycan, Misir, Hindistan, Kanada, Meksika, Rusiya, Serbiya və ABŞ-da nəşr olunub. Onlar Rusiyanın böyük kitabxanalarında, ABŞ-da Konqres Kitabxanasında, Böyük Britaniyada Kral Kitabxanasında, Azərbaycan Milli Kitabxanasında, Berlin və Münxen kitabxanalarında, ABŞ, Almaniya, İspaniya və digər ölkələrin universitet kolleksiyalarında saxlanılır.
Eldar Əhədovun iki nəşri Tümen vilayətində və Krasnoyarsk diyarında müvafiq olaraq 2020 və 2022-ci illərdə “İlin ən yaxşı kitabı” kimi tanınıb.