İsrail Fələstinin radikal HƏMAS hərəkatının məğlubiyyətinə və Qəzza zolağından bütün girovların qaytarılmasına nail olacaq. İsrailin baş naziri Benyamin Netanyahu bunu ölkəsinə qarşı İsrail-Fələstin münaqişəsində yeni kəskinləşməyə səbəb olan radikal hücumun ikinci ildönümündə bəyan edib.
O, 2023-cü il oktyabrın 7-də baş verən hadisələrdən danışaraq, bunu israillilərin “son dərəcə ağrılı bədəl ödədiyi” “dəhşətli qırğın” adlandırıb. “Qaniçən düşmənlərimiz bizə ağır zərbə vurdular, lakin bizi qırmadılar. Onlar İsrail xalqının nəhəng qüdrətindən tezliklə xəbər tutdular. Yeddi cəbhədə dirçəliş müharibəsi bizim evimiz üçün taleyüklü müharibədir: bizim varlığımız və gələcəyimiz üçün müharibə. Dözülməz ağrılarla yanaşı, böyük qürur hissi keçiririk”. Müraciət baş nazirlik tərəfindən yayılıb.
Netanyahu vurğulayıb ki, İsrail ordusu yəhudi dövlətinə zərər vurmaq istəyən hər kəsə “əzici cavab verir”. “Biz birlikdə İran oxunu sındırdıq, birlikdə Yaxın Şərqin simasını dəyişdik və birlikdə İsrailin əbədiliyini təmin edəcəyik. İsrail vətəndaşları, biz həlledici, taleyüklü günlər yaşayırıq. Müharibənin bütün məqsədlərinə nail olmaq üçün fəaliyyətimizə davam edəcəyik: bütün girovların qaytarılması, HƏMAS hakimiyyətinin sonu və Qəzza zolağının İsraili bir daha təhdid etməməsini təmin etmək.”