Prezident İlham Əliyevin Qazaxıstana dövlət səfəri bir daha göstərdi ki, Azərbaycan bu gün regionda təkcə iqtisadi deyil, həm də diplomatik güc mərkəzi kimi çıxış edir. Azərbaycan Prezidentinin Qazaxıstan lideri Kasım-Jomart Tokayevlə görüşü zamanı səsləndirdiyi bəyanatlar region siyasətində yeni mərhələnin əsasını qoydu. Dövlətimizin başçısının xüsusilə Ermənistan istiqamətində yüklərin tranzitinə qoyulmuş məhdudiyyətlərin aradan qaldırılması barədə bəyanatı Cənubi Qafqazda tarixi hadisə kimi dəyərləndirilməlidir.
44 günlük müharibədən, ardınca gələn sülh deklarasiyasından sonra (2025-ci ilin avqustunda Vaşinqtonda imzalanmış Bəyannamədən sonra) bu addım Prezident İlham Əliyevin dediyi kimi, regionda yalnız “kağız üzərində” deyil, praktiki əməkdaşlığa keçidin göstəricisidir.
Bu fikirləri AZƏRTAC-a müsahibəsində Milli Məclisin deputatı, filologiya elmləri doktoru Elnarə Akimova söyləyib. Deputat vurğulayıb ki, bu bəyanat, əslində, sadəcə logistik addım deyil. Bu, Zəngəzur yolunun faktiki açılışı deməkdir. Prezident İlham Əliyev uzun illərdir ki, Cənubi Qafqazda sülhün və iqtisadi inteqrasiyanın əsas memarı kimi çıxış edir. O, bu dəfə də praktik diplomatiya nümunəsi göstərərək, regionda etimad mühitinin bərpasına xidmət edən strateji qərar verdi.
“Azərbaycan artıq öz ərazisindən Ermənistana yüklərin tranzitinə icazə verir”, – deyən dövlətimizin başçısının bu sözləri təkcə bir iqtisadi qərarın deyil, həm də tarixi siyasi prosesin başlanğıcıdır. Çünki bu addım Zəngəzur dəhlizinin ideyadan reallığa çevrildiyini, yəni Azərbaycan ərazisindən keçən beynəlxalq nəqliyyat xətlərinin faktiki fəaliyyətə başladığını göstərir.
“Bu hadisə regionda qüvvələr balansını bir daha Azərbaycanın xeyrinə dəyişir. Qazaxıstanın taxıl yüklərinin Azərbaycan üzərindən Gürcüstan və Ermənistan istiqamətində daşınması həm “Orta Dəhliz”in əhəmiyyətini artırır, həm də Bakını regionun əsas logistika və diplomatiya mərkəzinə çevirir”, – deyə o əlavə edib.
Müsahibimiz bildirib ki, Zəngəzur yolunun faktiki açılması Azərbaycanın diplomatik qələbəsi, Cənubi Qafqazda yeni reallığın formalaşmasıdır. Bu addım göstərdi ki, qalib ölkə olaraq Azərbaycan sülhü yalnız bəyanatlarla deyil, əməli addımlarla qurur. Bu, Prezident İlham Əliyevin uzaqgörən siyasətinin, qalib diplomatiyasının növbəti mərhələsidir.
“Bu gün Azərbaycan regional əməkdaşlığın, sabitliyin və qarşılıqlı etimadın aparıcı qüvvəsinə çevrilib. Əgər 2020-ci ilin Zəfəri hərbi gücün təntənəsi idisə, bu gün baş verənlər diplomatik zəfərin nümayişidir. Prezident İlham Əliyev sülhün və inteqrasiyanın memarı kimi yeni bir tarix yazır – körpülər qurulan, dəhlizlər açılan, xalqları birləşdirən tarix”, – deyə E. Akimova fikrini yekunlaşdırıb.