Oktyabrın 28-i axşamdan etibarən İsrailin Qəzza zolağına endirdiyi aviazərbələr nəticəsində ölənlərin sayı 104-ə çatıb, Fələstin anklavının Səhiyyə Nazirliyi bildirib.
Onun sözlərinə görə, qurbanlar arasında 46 uşaq və 20 qadın var. 253 fələstinli yaralanıb.
WAFA xəbər agentliyi tibb ekspertlərinə istinadən xəbər verir ki, İsrailin Qəzza zolağının mərkəzində yerləşən Nuseyrat qaçqın düşərgəsinə endirdiyi hava zərbəsi nəticəsində fələstinli qəzet jurnalisti həlak olub. Agentliyin məlumatına görə, İsrailin aviazərbələri Qəzzanın qərbində yerləşən əş-Şati qaçqın düşərgəsində bütöv bir məhəlləni dağıdıb və xeyli itki verib.
Oktyabrın 28-i axşam saatlarında İsrailin baş naziri Benyamin Netanyahu Qəzza zolağına böyük zərbə endirilməsi barədə göstəriş verib. İsrailin bildirdiyinə görə, HƏMAS tərəfdarları Qəzza zolağının cənubundakı Rəfah bölgəsində İsrail əsgərlərini atəşə tutaraq atəşkəsi pozduqdan sonra baş nazir bu qərarı hərbçilərlə görüşü zamanı verib. İsrail ordusu cavab olaraq anklavdakı bir neçə hərbi obyektə hücum edib. HƏMAS Rəfəh hadisəsində hər hansı əli olduğunu inkar edib və atəşkəs razılaşmasına sadiq qalıb. (Tass)