Büdcə zərfi çərçivəsində müdafiə qabiliyyətinin və təhlükəsizliyin təmini üçün tədbirlər tam şəkildə nəzərə alınıb, həmçinin hər bir azərbaycanlının rifahının təmini üçün sosial tədbirlər tam maliyyələşib.
APA xəbər verir ki, bunu Milli Məclisin İqtisadi siyasət, sənaye və sahibkarlıq komitəsinin iclasında “Azərbaycan Respublikasının 2026-cı il dövlət büdcəsi haqqında” qanun layihəsinin müzakirəsi zamanı maliyyə naziri Sahil Babayev deyib.
Maliyyə naziri bildirib ki, son beş ildə (2022-2026-cı illər) müdafiə və milli təhlükəsizlik xərclərində 3,8 mlrd. manat və ya 1,8 dəfə artım olub: “Azərbaycanın təhlükəsizliyinin və müdafiə qabiliyyətinin gücləndirilməsi ana hədəflərdəndir və növbəti illərdə də bu istiqamətdə bütün zəruri xərclər üçün resurs yaradılacaq. Azad edilmiş ərazilərin bərpası və vətəndaşların köçürülməsi üçün bütün tədbirlər büdcədə müəyyən olunub. İnfrastrukturun daha da yaxşılaşdırılması üçün tədbirlər də büdcə zərfində nəzərdə tutulub. Ana hədfələrimizdən biri olan neft gəlirlərindən asılılığın azaldılması büdcəmizdə təmin edilib. Ölkə başçısının tapşırığına əsasən büdcə xərcləri optimallaşdırılması və izafi xərclərin qarşısının alınması üçün müvafiq çərçivə təmin edilib”.