Serbiya prezidenti Aleksandar Vuçiç bəyan edib ki, o, Kosovonun müstəqilliyini tanımaq və ya Avropaya inteqrasiya prosesini sürətləndirmək üçün Rusiyaya qarşı sanksiyalar tətbiq etmək niyyətində deyil. Bunu dövlət başçısı Brüsseldə jurnalistlərə açıqlamasında deyib.
“Bizim seçimimiz var. İstəsəniz, sabah, sözün əsl mənasında, sabah Rusiya Federasiyasına qarşı sanksiyalar tətbiq edəcəyik. Əgər istəsəniz, sabah bəyan edəcəyik ki, biz Kosovonun müstəqilliyini tanıyırıq və istədiyiniz vaxt Avropa İttifaqına üzv olacağıq”, – Serbiya lideri Aİ-nin genişlənmə sammitindən sonra jurnalistlərin suallarını cavablandırıb.
O, belə addımların Belqrad üçün qəbuledilməz olduğunu vurğulayıb.
“Mənə deyin – siz istəyirsiniz ki, bu, bizim siyasətimiz olsun? Düşünmürəm ki, biz müstəqil Kosovonu tanımalıyıq. Düşünmürəm ki, biz sanksiyalar tətbiq edək”, – Vuçiç deyib.
Prezidentin sözlərinə görə, Serbiyaya təzyiq sırf siyasi xarakter daşıyır.
(Tass)