Noyabrın 30-dan dekabrın 12-dək Dubayda keçiriləcək BMT-nin İqlim Dəyişikliyi üzrə Çərçivə Konvensiyasının (COP28) 28-ci Tərəflər Konfransında iştirak edən ölkələr iqlim dəyişikliyi ilə bağlı dəymiş ziyana görə inkişaf etməkdə olan ölkələrə 100 milyard dollar ödəməyə razı olacaqlar. Bu barədə ABŞ prezidentinin iqlim məsələləri üzrə xüsusi nümayəndəsi, keçmiş dövlət katibi Con Kerri bildirib.
“Biz bu il [inkişaf etməkdə olan ölkələrdə iqlim dəyişikliyindən itki və zərərləri kompensasiya etmək üçün] 100 milyard dollarlıq fond yaratmaq üçün saziş bağlayacağıq və gələn ildən əvvəl onu həyata keçirəcəyik” deyə o, Bloomberg müsahibəsində bildirib. Onun sözlərinə görə, bu, əldə edilmiş iqlim razılaşmalarının həyata keçirilməsi prosesini sürətləndirəcək. Kerrinin sözlərinə görə, konfransda həmçinin iqlim məqsədlərinə doğru irəliləyişin “Paris razılaşması çərçivəsində ilk” təhlili, eləcə də dünyanın iqlim dəyişikliyinə necə uyğunlaşa biləcəyi ilə bağlı hesabat təqdim olunacaq.
Kerri qeyd edib ki, ABŞ-ın keçmiş prezidenti Donald Tramp Paris sazişindən çıxdıqdan və iqlimlə bağlı məqsədlərin maliyyələşdirilməsini dəstəkləmədiyi üçün ABŞ hələ də belə məqsədlər üçün vəsait ayırmayıb. ABŞ-ın keçmiş dövlət katibi “Nəticə odur ki, o zaman ABŞ pis reputasiya qazandı” dedi və əlavə etdi ki, indi “dünya çox fərqli bir yerdir” və insanlar iqlim məsələlərinə “daha ciddi yanaşırlar” və buna hazırdırlar. Kerrinin fikrincə, hərəkətsizlik təkcə böyük maliyyə itkilərinə deyil, həm də insanların ölümünə, bütün regionların “dağıdılmasına” və kütləvi miqrasiyaya səbəb ola bilər. (Tass)