“Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair 2025–2030-cu illər üçün Dövlət Proqramı”nın həyata keçirilməsi üzrə Tədbirlər Planına əsasən, narkotik vasitələrin, psixotrop maddələrin və onların prekursorlarının qanunsuz dövriyyəsinə qarşı mübarizə sahəsində normativ hüquqi aktların müddəalarının və tələblərinin əhaliyə izah edilməsi məqsədilə bədii-sənədli film hazırlanıb.
Bu barədə AZƏRTAC-a Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının daimi fəaliyyət göstərən İşçi Qrupundan məlumat verilib.
Bildirilib ki, Dövlət Komissiyasının daimi fəaliyyət göstərən İşçi Qrupunun və Azərbaycan Respublikası Audiovizual Şurasının birgə təşkilatçılığı ilə Qeyri-Hökumət Təşkilatlarına Dövlət Dəstəyi Agentliyinin vəsaiti əsasında çəkilmiş “Qara tale – ağ ölüm” adlı bədii-sənədli film ölkənin televiziya kanallarında nümayiş olunur.
Narkomaniyanın dəhşətlərindən və qurbanlarından bəhs edən film Dünya TV, ATV, İdman TV, ARB 24, Kanal S və Baku TV kanallarında yayımlanıb.
Filmin digər televiziya kanallarında, media subyektlərində və sosial şəbəkələrdə də yayımlanması nəzərdə tutulur.