Türk xalqları eyni qana, eyni ruha və oxşar düşüncəyə malikdirlər. Ona görə də türk xalqlarının nağıllarında ortaq motivlər çoxdur. Türk xalq qəhrəmanlarının çoxu əsasən öz taleyindən güc alır. Bu, “Koroğlu”, “Manas” və “Alpamış” kimi əsərlərdə bariz şəkildə görünür. Nağıllarda qəhrəmanların daha çox milli müdafiəçi statusunda təqdim olunması da vacib məqamlardandır. Bu, xalqların düşmənə qarşı birləşmək əzmindən doğan düşüncələrin mifik təzahürüdür.
Bunu AZƏRTAC-a açıqlamasında tanınmış gənc şair, Azərbaycan Yazıçılar Birliyinin Gənclər Şurasının sədri Fərid Hüseyn deyib.
Onun sözlərnə görə, türk xalqlarının nağıllarında eyni mifoloji kultlara inam da müşahidə olunur: mələyə, ata, fövqəlgücə və s. Belə nağıllarda sonuncu övladın daha ağıllı olması, nəsil davamına verilən xüsusi önəm kimi motivlərə də rast gəlinir. Bütün bunlar türk xalqlarının mədəni kimliyinin göstəriciləri kimi qiymətləndirilə bilər.
O əlavə edib ki, türk xalqları və dövlətləri inteqrasiya, siyasi və mənəvi birlik baxımından qızıl dövrünü yaşayır. Türk xalqlarının birliyi mədəniyyət, ədəbiyyat, incəsənət və elm sahələrində də özünü göstərir. Bu birliyin güclənməsi və gələcək nəsillərə ötürülməsi üçün gənclərin rolu xüsusi əhəmiyyət kəsb edir.