“Report” xəbər verir ki, bunu Baş nazirin müavini, Dayanıqlı İnkişaf üzrə Milli Əlaqələndirmə Şurasının sədri Əli Əhmədov Bakıda keçirilən “Dayanıqlı maliyyə və investisiya” mövzusunda II Bakı Forumunda deyib.

Onun sözlərinə görə, Azərbaycan hökuməti qlobal layihə olan DİM-in həyata keçirilməsini özünün prioritetlərindən biri hesab edir: “Biz DİM-i hökümətin həyata keçirdiyi milli inkişaf strategiyasının tərkibinə daxil etməklə inteqrasiyanı təmin etdik. Bunun sayəsində də DİM-in həyata keçirilməsi nəticə etibarilə Azərbaycan hökumətinin milli inkişaf proqramının həyata keçirilməsi anlamına gəlir. Yaxud da əksinə digər formada bunu təqdir etmiş olsaq Azərbaycanın milli inkişaf proqramının həyata keçirilməsi nəticə etibarı ilə Dayanıqlı İnkişaf Məqsədlərinin də həyata keçirilməsini təmin etmiş olur.

Həmin vəzifəni reallaşdırarkən eyni zamanda DİM-in həyata keçirilməsinin icrasının maliyyə əsasları kimi vacib məsələnin həlli formulunu da tapmış olduq. Beləliklə də DİM-in həyata keçirilməsinin maliyyə əsasları bu gün əsas etibarı ilə dövlət büdcəsidir. Bura büdcədənkənar vəsaitlər, o cümlədən özəl investisiyalar da cəlb olunsa da ancaq yenə də əsas mənbə dövlət büdcəsidir”.