Türkiyənin xarici işlər naziri Hakan Fidan Qəzza sülh prosesinin müsbət mərhələyə qədəm qoyduğunu, lakin İsrail siyasətində hələ də heç bir dəyişiklik olmadığını bildirib.
“Fələstinlilərin orada soyuqda, sığınacaqsız, dərmansız, yeməksiz qalması bizi dərindən narahat edir. Biz həmçinin bilirik ki, İsrail bu məsələ ilə bağlı sistemli və məqsədyönlü siyasət yürüdür. Biz bilirik ki, Netanyahu hökuməti bütövlükdə beynəlxalq ictimaiyyətin birlikdə həyata keçirmək istədiyi sülh planının həyata keçirilməsini dəstəkləmir. İsrailin əsas məqsədi fələstinliləri Qəzzadan qovmaqdır”, – deyə o, İstanbulda keçirilən mətbuat konfransında bildirib.
Fidan xatırladıb ki, “beynəlxalq ictimaiyyət regional ölkələrin və ABŞ-ın köməyi ilə bu sülh prosesini hazırkı mərhələyə gətirib”. “İndi, ikinci mərhələdə prioritet Qəzzanın idarəçiliyinin Fələstin komitəsinə verilməsidir. Daha sonra Sülh Şurasının tərkibi elan ediləcək və daha sonra idarəetmə şurası yaradılacaq. Bu məsələ ilə bağlı hələ də bir sıra prosedur aspektləri var. Gözləyirik ki, yaxın bir neçə həftə ərzində hər şey yaxşı gedərsə, bu qurumlar fəaliyyətə başlayacaq. Yəni, biz nizamlamanın müsbət mərhələsinə qədəm qoyuruq, amma dediyim kimi, risklər qalır və İsrailin niyyətləri də aydındır”, – Fidan qeyd edib.
O əlavə edib ki, “İsrailin fələstinlilərə qarşı təzyiqi və vəhşiliyi dayandırıldıqda və hər şey normallaşdıqda, Türkiyənin İsrail ilə münasibətlərini normallaşdırmaqda heç bir problemi olmayacaq”. Lakin Fidanın sözlərinə görə, onun regional siyasəti hazırkı formada davam etdiyi müddətcə Ankara ilə Təl-Əviv arasında normallaşma mümkün deyil. (Tass)