Avropa İttifaqı liderləri mart ayında Brüsseldə keçiriləcək növbəti Aİ sammitində Ukraynaya 10 il ərzində 1,5 trilyon dollar ayırmaq barədə qərar qəbul etmək niyyətindədirlər. Bu barədə Macarıstan Baş nazirinin ofisinin rəhbəri Gergeli Qulyas məlumat verib və Macarıstan hökumətinin Aİ rəhbərliyinin planına qarşı çıxacağı barədə xəbərdarlıq edib.
“Hazırda Brüsseldə atılan bütün addımlar [Ukraynada] müharibənin davam etdirilməsinə yönəlib. Onlar mart ayında keçiriləcək Avropa Birliyi sammitində bu məqsədlə qərarlar qəbul etmək istəyirlər. Macarıstan müharibənin maliyyələşdirilməsinə müqavimət göstərməyə çalışır, ona görə də bu barədə dəqiq mövqe tutmağımız vacibdir”, – deyə Qulyas jurnalistlərlə görüşdə bildirib.
O xatırladıb ki, son dörd ildə Aİ Ukraynanı dəstəkləmək üçün 193 milyard avro xərcləyib. Baş nazirin ofisinin rəhbəri qeyd edib ki, “Bu, bizim, macarların, [2004-cü ildə] icmaya qoşulduğumuzdan bəri Aİ-dən aldığımız məbləğdən üç dəfə çoxdur”. (Tass)