Beynəlxalq Türk Akademiyasının prezidenti akademik Şahin Mustafayev tanınmış türk tarixçisi, Türk Tarix Qurumunun fəxri üzvü, Beynəlxalq Osmanlı Araşdırmaları Komitəsinin İdarə Heyətinin üzvü professor İlber Ortaylı ilə görüşüb.
Bu barədə AZƏRTAC-a Beynəlxalq Türk Akademiyasından məlumat verilib. Bildirilib ki, qonaq Beynəlxalq Türk Akademiyasında Türkiyə Muzeyi və Türk kitabxanasını ziyarət edib, tanınmış türkoloqların şəxsi əşyaları və kitab kolleksiyaları ilə tanış olub.
Görüş zamanı türk dövlətləri arasında elm, mədəniyyət və tarixi irsin qorunması sahəsində əməkdaşlıq məsələləri, eləcə də türk ziyalılarının tarixi və maarifləndirici düşüncələri ilə bağlı müzakirələr aparılıb.
Şahin Mustafayev professor İlber Ortaylıya Beynəlxalq Türk Akademiyasının fəaliyyəti, türk dünyasında elmi inteqrasiyanın dərinləşdirilməsi və inkişafı istiqamətində həyata keçirilən layihələr haqqında məlumat verib.
Akademiyaya ilk dəfə gələn İlber Ortaylı görülən işlərə görə təşəkkür edib, nəşrlərini Beynəlxalq Türk Akademiyasının kitabxanasına hədiyyə edib.