İran Hərbi Dəniz Qüvvələri Hörmüz boğazına tam nəzarət edir. İİKK-nın (İran Silahlı Qüvvələrinin elit bölməsi olan İslam İnqilabı Keşikçiləri Korpusu) sözçüsü Məhəmməd Əkbərzadənin sözlərinə görə, bu boğazdan keçməyə çalışan on neft tankeri artıq raket və dronlarla vurulub.
“İİKK Hərbi Dəniz Qüvvələri dəfələrlə Hörmüz boğazından keçidin hazırda təhlükəli olduğunu xəbərdar edib, lakin 10 tanker tələblərimizi qulaqardına vurub və raketlər və dronlar vasitəsilə məhv edilib. Hazırda boğaza tam nəzarət edən İrandır”, – deyə Əkbərzadə vurğulayıb.
Martın 3-də İİKK-nın baş komandanı general İbrahim Cabari bildirib ki, İranın Hörmüz boğazını bağlaması səbəbindən neftin qiymətləri bir barel üçün 200 dollara çata bilər. O, əlavə edib ki, İslam Respublikası regiondan “yanacaq ixrac etməyə çalışan istənilən ölkəyə” zərbə endirəcək. (TASS)