İran hakimiyyəti ABŞ və ya digər tərəflərlə yeni danışıqlar aparılacağı təqdirdə zənginləşdirilmiş uran ehtiyatlarının gələcəyi ilə bağlı məsələlər qaldıra bilər. Bu barədə İranın xarici işlər naziri Abbas Əraqçi CBS -ə verdiyi müsahibədə bildirib.
“Bu, amerikalı tərəfdaşlarımızla müzakirə etdiyimiz razılaşmanın elementlərindən biri idi”, – deyə o, İranın İslam Respublikasının uranın zənginləşdirmə səviyyəsini azaltmaq istəyini ifadə edib-etməməsi ilə bağlı suala cavab verdi. “Bu element 60%-ə qədər zənginləşdirilmiş İran materialı ilə bağlı idi. Mən dedim ki, materialın zənginləşdirmə səviyyəsini azaltmağa, onu qarışdırmağa və beləliklə, səviyyənin daha aşağı olmasına hazırıq. Bu, ciddi bir təklif idi. İranın heç vaxt nüvə silahı əldə etməyə çalışmadığını və heç vaxt etməyəcəyini göstərmək üçün böyük bir güzəşt idi.”
İranın bunu indi etməyə hazır olub-olmadığı sualına Əraqçi belə cavab verib: “Hazırda masada heç nə yoxdur. Hamısı gələcəkdən asılıdır. Gələcəkdə bir məqamda ABŞ və ya digər tərəflərlə danışıqlara başlamaq qərarına gəlsək, bunu təklif edə bilərik. Hazırda masada heç nə yoxdur.” (TASS)