İran dronlardan istifadə və Hörmüz boğazının bağlanması ilə ABŞ-ı iqtisadi cəhətdən baha başa gələn müharibəyə məcbur edə bilib ki, bu da Vaşinqton üçün tamamilə gözlənilməzdir. Bu fikirləri əvvəllər Əfqanıstandakı NATO qüvvələrinə komandanlıq etmiş təqaüdçü general Devid Freyzer Kanadanın CTV televiziya kanalına bildirib.
“Hazırda bu, artıq iqtisadi müharibədir. 60.000 dollara başa gələn bir [İran] pilotsuz təyyarəsinin vurulmasının [ABŞ-ın] xərcləri qiymət baxımından 163 dollara 1 dollar ola bilər. Əlbəttə ki, bu, səmərəli deyil”, – deyə ekspert bildirib.
Freyzer əlavə edib ki, İran hərbi cəhətdən ABŞ-dan zəif olsa da, nisbətən ucuz dronlardan istifadə və Hörmüz boğazının bağlanması ilə amerikalılara iqtisadi ziyan vura bilib. “ABŞ ikinci nəfəs tapan iranlıları tamamilə qiymətləndirməyib”, – deyə təqaüdçü general bildirib. (Tass)