İran Xarici İşlər Nazirliyi Bolqarıstan hakimiyyətini ABŞ-la qarşıdurmaya müdaxilə təhlükəsi barədə xəbərdar etdi. “Belə bir xalq var” partiyasının nümayəndəsi Stanislav Balabanov bunu Bolqarıstan parlamentinin fövqəladə iclasında açıqladı. İclas Bolqarıstan Milli Televiziyası tərəfindən yayımlanıb.
Parlament tribunasından siyasətçi İran səfirliyinin 18 martda Bolqarıstan Xarici İşlər Nazirliyinə göndərdiyi rəsmi notanın surətini göstərərək parlamentin bu barədə məlumat almamasına təəccübləndiyini bildirib.
Xarici işlər nazirinin müavini Marin Raikov brifinqdə müvafiq sənədin alındığını təsdiqləyib, lakin “İranla diplomatik münasibətlərin səviyyəsinin dəyişməz qaldığını” və “Bolqarıstan ərazisində döyüş təyyarələrinin olmadığını” vurğulayıb.
Diplomat bildirib ki, “Hərbi əməliyyatlarda iştirak edən döyüş təyyarələri Bolqarıstan üzərindən uçmur və yanacaq doldurmur. Bolqarıstan bu müharibədə iştirak etmir və iştirak etmək niyyətində də deyil”. O, hazırda Sofiya hava limanında yerləşən ABŞ tanker təyyarələrinin Bolqarıstana raket hücumu üçün əsas təşkil etmədiyi qənaətinə gəlib.