Türkiyənin aparıcı müxalifət partiyası olan Cümhuriyyət Xalq Partiyasının lideri Özgür Özel ABŞ-ın Ankaradakı səfiri Tom Barrakı regionda monarxiyanı ən uğurlu idarəetmə modeli kimi təriflədiyinə görə üzr istəməyə çağırıb. Əks halda, o, arzuolunmaz şəxs elan olunmalıdır, Halk TV siyasətçinin sözlərinə istinadən bildirib.
Telekanalın məlumatına görə, Antalya Diplomatik Forumunda iştirak edən Amerika səfiri Yaxın Şərqdə “yalnız gücə hörmət edildiyini” iddia edib. Barak bildirib ki, “bölgədə yalnız monarxiyalar uğur qazanır; demokratiya uğursuzluğa düçar olub”.
“Tom Barrak ifadələrini geri götürüb Türkiyə Respublikasından və bu ölkədə yaşayan hər kəsdən üzr istəyənə qədər, onun ərazisində bir dəqiqə də vəzifələrini yerinə yetirməməlidir. Bu andan etibarən Tom Barrak Türkiyə demokratiyası baxımından arzuolunmaz şəxsdir; biz onu arzuolunmaz şəxs elan edirik”, – deyə Türkiyə müxalifət lideri bildirib.
Barrak ABŞ-ın Türkiyədəki səfiri və ABŞ prezidentinin Suriya üzrə xüsusi nümayəndəsidir. Onun Vaşinqtonun xarici siyasəti və Türkiyə ilə münasibətləri ilə bağlı açıqlamaları dəfələrlə ölkədə əks-səda doğurub. (Tass)