Ötən il qlobal miqyasda külək enerjisi üzrə quraşdırma gücü rekord səviyyədə – 165 giqavat artaraq 1299 giqavata yüksəlib.
AZƏRTAC xəbər verir ki, bu barədə Qlobal Külək Enerjisi Şurasının (GWEC) hesabatında deyilir.
Bildirilir ki, külək enerjisi böyük iqtisadiyyatlarda enerji keçidinin əsasını təşkil etməyə davam edir. Belə ki, Çin ötən il rekord səviyyədə – 120 giqavatlıq külək enerjisi qurğusu əlavə edərək ümumi külək enerjisi gücünü 640 giqavata çatdırıb. Hindistanın rekord səviyyədə – 6,3 giqavat güc əlavə etməsi dünyanın ən sürətlə böyüyən iqtisadiyyatında külək enerjisinin əhəmiyyətini daha da gücləndirib. Avropada isə Almaniya öz sisteminə (quruda və dənizdə daxil olmaqla) 5,7 giqavat külək gücü əlavə edib. Braziliya bu göztərici 2,3 giqavat əlavə edib.
Hesabatda vurğulanır ki, qlobal külək enerjisi sənayesi 2030-cu ilə qədər qlobal bərpaolunan enerji gücünü üçqat artırmaq hədəfinin müəyyənləşdirildiyi COP28-a uyğun olaraq lazımi artım tempini qorumağa sadiqdir.