Mingəçevir Dövlət Universitetində magistr səviyyəsində tədqiqat mövzularının seçiminə yeni yanaşma tətbiq olunur. Artıq dissertasiya mövzularının birbaşa sənayenin ehtiyacları əsasında formalaşdırılması nəzərdə tutulur. Bu çərçivədə 62 sənaye tərəfdaşından mövzuların daxil olması prosesi başlayıb. Həmin mövzular magistrantların tədqiqat istiqamətlərini müəyyən edəcək, müdafiələr isə onları təqdim edən sənaye nümayəndələrinin iştirakı ilə təşkil olunacaq.
Universitetin İctimai əlaqələr şöbəsinin müdiri – mətbuat katibi Firuzə İskəndərova AZƏRTAC-a bildirib ki, bu yanaşma magistr təhsilinin məzmununu dəyişəcək. Sənayedən gələn mövzular tədqiqatların real nəticələrə yönəlməsinə və praktik dəyərinin artmasına şərait yaradacaq. Bu mövzuların işlənməsi və tətbiq edilə bilən nəticələrlə tamamlanması universitetin nəzdində yaradılmış iki tədqiqat institutunun üzərinə düşəcək.
F.İskəndərova əlavə edib ki, model universitet rəhbərliyinin Türkiyəyə səfəri zamanı Orta Doğu Texniki Universitetində öyrənilən təcrübəyə əsaslanır və tezliklə geniş tətbiq olunacaq.