Azərbaycan və Çexiya arasında diplomatik münasibətlər 1993-cü ildə başlayıb. Bu tarixdən sonra iki ölkə arasındakı əməkdaşlıq tədricən genişlənib, siyasi, iqtisadi, mədəni və humanitar sahələri əhatə edən çoxtərəfli xarakter qazanıb.
Bu fikirləri AZƏRTAC-a açıqlamasında politoloq Tural İsmayılov söyləyib.
O bildirib ki, Azərbaycanın Praqada, Çexiyanın isə Bakıda fəaliyyət göstərən səfirlikləri bu münasibətlərin institutlaşmasının bariz göstəricisidir. Hər iki ölkənin rəhbərliyi arasında müntəzəm görüşlər ikitərəfli dialoqu canlı saxlayır, əməkdaşlığın yeni istiqamətlərini müəyyən edir.
“Azərbaycan Prezidenti İlham Əliyevin apardığı müdrik və praqmatik xarici siyasət nəticəsində ölkəmiz Avropanın ən etibarlı tərəfdaşlarından biri kimi tanınır. Çexiya da bu kontekstdə Azərbaycanın Mərkəzi Avropa ilə əlaqələrinin inkişafında xüsusi rol oynayan dövlət kimi diqqəti cəlb edir. İki ölkə arasında imzalanan sazişlər, birgə bəyannamələr və əməkdaşlıq protokolları münasibətlərin hüquqi bazasını möhkəmləndirib.
“Azərbaycan-Çexiya münasibətlərinin ən güclü sütunlarından biri enerji sahəsindəki əməkdaşlıqdır. Azərbaycan zəngin karbohidrogen ehtiyatları ilə Avropanın enerji təhlükəsizliyinin əvəzsiz dayağına çevrilib. TANAP və TAP boru kəmərləri Azərbaycanı Avropa İttifaqının ən etibarlı enerji tərəfdaşı kimi güclü mövqeyini formalaşdırıb. Rusiya-Ukrayna müharibəsinin yaratdığı enerji böhranı fonunda Azərbaycanın bu rolu xeyli artıb. Çexiya enerji asılılığını azaltmaq məqsədilə Azərbaycanla əlaqələrini daha da dərinləşdirməyə böyük maraq göstərir.
Ticarət dövriyyəsi baxımından da əməkdaşlıq ildən-ilə inkişaf edir. Maşınqayırma, texnologiya, ərzaq sənayesi və tikinti materialları sahələrində ticarət əlaqələri genişlənib. Azərbaycanın əlverişli investisiya iqlimi və strateji coğrafi mövqeyi Çex iş adamlarını ölkəmizə cəlb edir. Hökumətin həyata keçirdiyi islahatlar nəticəsində iş mühiti daha şəffaf və rəqabətli xarakter alıb”,- deyə T.İsmayılov vurğulayıb.
Politoloq əlavə edib ki, Azərbaycanın 2020-ci il 44 günlük Vətən müharibəsində tarixi Qələbə qazanması beynəlxalq hüququn əsl zəfəri kimi tarixə düşüb. Ərazi bütövlüyünü bərpa etməklə Azərbaycan dünyaya güclü bir mesaj verib. Çexiya da bu çərçivədə bölgədə sülhün və sabitliyin bərqərar olmasına dəstək verir.
Mədəniyyət və təhsil sahəsindəki əlaqələr də münasibətlərin ayrılmaz hissəsini təşkil edir. Praqada yaşayan Azərbaycan diasporu iki xalq arasında canlı körpü rolunu oynayır. Tələbə mübadiləsi proqramları gənc nəsillər arasında dostluq körpüsü qurur. Bakı, Şəki, Qəbələ kimi şəhərlər isə çex turistlərinin getdikcə daha çox maraq göstərdiyi istiqamətlərə çevrilib. Azərbaycanın zəngin tarixi irsi, füsunkar təbiəti və qonaqpərvər xalqı hər ziyarətçiyə unutulmaz təəssüratlar bəxş edir.
“Azərbaycan-Çexiya münasibətləri qarşılıqlı hörmət, etimad və birgə inkişaf prinsipləri üzərində qurulub. Bu tərəfdaşlıq hər iki ölkənin milli maraqlarına xidmət edir, bölgədə sabitliyə töhfə verir. Azərbaycanın dinamik inkişafı, güclü dövlətçilik ənənəsi və çevik diplomatiyası gələcəkdə Praqa ilə Bakı arasındakı əlaqələrin daha da dərinləşəcəyinə zəmanət verir”, – deyə T.İsmayılov bildirib.