APA xəbər verir ki, bununla bağlı Prezidentin sosial şəbəkə hesablarında paylaşım edilib.
ABŞ lideri öz şəxsi qeydi ilə müşayiət olunan “Azadlığa dəstək aktı”na 907-ci düzəlişin icrasının dayandırılmasına dair memorandumu xatirə hədiyyəsi kimi, Azərbaycan dövlət başçısına göndərib.
Azərbaycan Prezidenti xoş sözlərinə görə Donald Trampa təşəkkür edib.
“Möhtərəm Prezident Donald Tramp,
Azadlığa Dəstək Aktına 907-ci düzəlişin dayandırılması müddətinin uzadılması barədə memorandumu şəxsi qeydiniz və xoş sözlərinizlə birlikdə mənə xatirə hədiyyəsi olaraq göndərdiyiniz üçün Sizə səmimi təşəkkürümü bildirmək istəyirəm. Bu diqqətəlayiq jesti yüksək qiymətləndirir və ona böyük ehtiram bəsləyirəm”, – Prezident İlham Əliyev vurğulayıb.
Qeyd edək ki, ötən ilin avqust ayında ABŞ Prezidenti tərəfindən “Azadlığa dəstək aktına” 907-ci düzəlişin tətbiqinin müvəqqəti olaraq dayandırılması ilə bağlı sərəncam imzalanıb. ABŞ Nümayəndələr Palatasının üzvü Anna Paulina Luna 907-ci düzəlişi tam ləğv etməyə yönəlmiş qanun layihəsini təqdim edib.
Xatırladaq ki, 1992-ci ildə qəbul olunmuş bu düzəliş Azərbaycana ABŞ dövlət yardımının göstərilməsini qadağan edir.
Rəsmi Bakı Azərbaycanla-ABŞ arasında münasibətlərin inkişaf perspektivləri, Azərbaycanın geniş regionda artan rolu nəzərə alınaraq, ABŞ tərəfinin bu düzəlişin tamamilə ləğv edilməsi istiqamətində əməli addımlar atacağına ümidvar olduğunu bəyan edib.