Cənubi Koreyanın Busan şəhərində keçirilən görüşdə Çin, Koreya Respublikası və Yaponiyanın xarici işlər nazirləri üçtərəfli sammitin tərəflər üçün ən əlverişli vaxtda keçirilməsi üçün lazımi hazırlıqları sürətləndirmək barədə razılığa gəliblər. Bu barədə Cənubi Koreyanın xarici işlər naziri Park Çin bildirib.
“Biz sammit üçün lazım olan hazırlığı sürətləndirmək barədə razılığa gəldik. Sammitin yaxın gələcəkdə baş tutmasını təmin etmək üçün səylərimizi davam etdirəcəyik”, – Yonhap xəbər agentliyi onun sözlərini sitat gətirib. “Biz üç dövlətin sammitinin tərəflər üçün əlverişli olan ən yaxın vaxtda keçirilməsinə dair razılığı təsdiqlədik”, – Pak Çin danışıqlardan sonra əlavə edib. Üç ölkənin xarici işlər nazirlərinin görüşü dörd ildə ilk dəfə keçirilib.
Bundan əlavə, ölkələr koronavirus və digər hallar səbəbindən çətinliklərlə üzləşən üçtərəfli əməkdaşlığı “bərpa etmək və normallaşdırmaq” barədə razılığa gəliblər, Park Çin deyib. Bundan əvvəl o, Çin və Yaponiyadan olan həmkarları Vanq Yi və Yoko Kamikava ilə ikitərəfli danışıqlar aparıb. (Tass)