AZƏRTAC-ın bölgə müxbiri xəbər verir ki, Laçın Rayon İcra Hakimiyyətinin əməkdaşları, ictimaiyyət nümayəndələri, şəhidin ailə üzvləri və döyüş yoldaşları şəhidin məzarını ziyarət edib, məzarı üzərinə gül-çiçək dəstələri düzüb, xatirəsini ehtiramla yad ediblər.

Mərasimdə 2020-ci il sentyabrın 27-də başlayan 44 günlük Vətən müharibəsindən, Azərbaycan Ordusunun qəhrəmanlığından, qazanılan şanlı Qələbədən danışılıb, şəhidlərin qısa, lakin şərəfli ömür yolunun hər bir azərbaycanlıya örnək olduğu bildirilib.

Qeyd edək ki, Nəcəfov Etibar Mehman oğlu Azərbaycan Ordusunun 2020-ci il sentyabrın 27-də başladığı əks-hücum əməliyyatları zamanı könüllü olaraq torpaqlarımızın azadlığı uğrunda gedən döyüşlərə qatılıb. O, Cəbrayıl, Füzuli, Zəngilan və Qubadlı rayonlarının azad edilməsi uğrunda döyüşlərdə iştirak edib, oktyabrın 20-də şəhidlik zirvəsinə yüksəlib. 2020-ci il noyabrın 26-da Ağcabədi rayonunun Taxtakörpü ərazisindəki Şeylanlı kənd qəbiristanlığında dəfn olunub.

Cəsur döyüşçü ölümündən sonra “Vətən uğrunda”, “Cəsur döyüşçü”, “Cəbrayılın azad olunmasına görə”, “Füzulinin azad olunmasına görə”, “Xocavəndin azad olunmasına görə” və “Qubadlının azad olunmasına görə” medalları ilə təltif edilib.