3 nömrəli Uşaq-Gənclər İnkişaf Mərkəzinin təşkilatçılığı ilə Xətai Sənət Mərkəzində “Şəhərsalma və Memarlıq İli” çərçivəsində Mərkəzin “Təsviri sənət və dizayn” dərnəyinin üzvlərinin rəsm və əl işlərindən ibarət “Xəyalımdakı şəhər” adlı sərgisi keçirilib.
Mərkəzdən AZƏRTAC-a bildirilib ki, sərgidə gənc rəssamların hazırladığı rəsm əsərləri, müxtəlif materiallardan hazırlanmış maketlər və əl işləri nümayiş olunub. Foreks, penoplast, karton və plastik materiallardan istifadə edilməklə ərsəyə gətirilən layihələrdə uşaqlar şəhərsalma və memarlıqla bağlı düşüncələrini yaradıcı şəkildə ifadə ediblər. Əl işlərində Azərbaycanın tarixi və müasir memarlıq nümunələri, habelə şəhər mühitinə dair müxtəlif təsvirlər yer alıb.
Qeyd edək ki, iştirakçılar keramika boşqablar üzərində də “Şəhərsalma və Memarlıq İli”nə həsr olunmuş əsərlər hazırlayıblar. İşlərdə qədim və müasir memarlıq nümunələri, planlı şəhər infrastrukturu, yaşıllıq zolaqları və ekoloji cəhətdən təmiz mühit ideyaları əksini tapıb. Sərgidə ümumilikdə 60 əl işi və böyük şəhər maketi təqdim olunub.
Tədbirdə Bakı Şəhəri üzrə Təhsil İdarəsinin, Azərbaycan Respublikası Dövlət Şəhərsalma və Arxitektura Komitəsinin Bakı Dövlət Layihə İnstitutunun, Azərbaycan Memarlıq və İnşaat Universitetinin nümayəndələri, rəssamlar, valideynlər və ictimaiyyət nümayəndələri iştirak ediblər.
Sərgi çərçivəsində nümayiş olunan əsərlər qonaqlar tərəfindən maraqla qarşılanıb. Tədbirin bədii hissəsində isə Mərkəzin gənc vokalçılarının ifasında musiqi nömrələri təqdim edilib.