Oman və İran Hörmüz boğazında gəmiçiliyin gələcək idarə olunmasını, o cümlədən gəmilərə göstərilən xidmətlərin dəyərini müzakirə etmək üçün birgə işçi qrupu yaratmaq barədə razılığa gəliblər. Bu barədə iki ölkənin İran nümayəndə heyətinin Məskətə səfərindən sonra yaydığı birgə bəyanatda bildirilib.
Oman Xarici İşlər Nazirliyi tərəfindən dərc edilmiş sənəddə deyilir: “Tərəflər Hörmüz boğazında gəmiçiliyin gələcək idarə olunması, göstərilən xidmətlər və əlaqəli xərclər barədə beynəlxalq standartlara uyğun olaraq razılığa gəlmək məqsədilə birgə işçi qrupu vasitəsilə bu məsələ ilə bağlı dialoqu davam etdirmək barədə razılığa gəliblər”.
Maskat və Tehran həmçinin bu məsələ ilə bağlı regiondakı digər sahilyanı ölkələr və maraqlı tərəflərlə məsləhətləşmələr aparmaq barədə razılığa gəliblər. Maskat və Tehran vurğulayıblar ki, hər hansı yeni razılaşma Oman və İranın boğazın ərazi suları üzərində suverenliyinə tam hörmət etməlidir. (Tass)