Gürcüstan hakimiyyəti Azərbaycan və Ermənistan arasında sülhün bərqərar olmasına aparan istənilən konstruktiv prosesi dəstəkləyəcək. Bunu Gürcüstanın baş naziri İrakli Qaribaşvili Ermənistan baş nazirinin aparatının rəhbəri Arayik Arutyunyanla görüşündə deyib.
“Regionda sülhün və sabitliyin dəstəklənməsi zərurəti ilə bağlı söhbət zamanı baş nazir vurğulayıb ki, Gürcüstan regionda sülhün və sabitliyin bərpasına yönəlmiş istənilən konstruktiv prosesi dəstəkləməyə açıqdır”, – Gürcüstan hökumətinin mətbuat xidməti bildirib.
Tbilisidə keçirilən görüşdə Qaribaşvili və Arutyunyan iki ölkə arasında əməkdaşlığı müzakirə ediblər və strateji məsələlər üzrə yüksək səviyyəli dialoqun təkcə Gürcüstan və Ermənistana deyil, bütün regiona fayda verəcəyini qeyd ediblər.
Əvvəllər Gürcüstan Ermənistanla Azərbaycan arasında münasibətlərin normallaşmasında dəfələrlə vasitəçi kimi çıxış edib. Xüsusilə, Tbilisinin vasitəçiliyi ilə 2021-ci ilin iyununda Azərbaycan Ermənistana 15 hərbi qulluqçu, İrəvan isə Bakıya minalanmış xəritələr göndərib. Vasitəçiliyin digər nümunəsi Ermənistan və Azərbaycanın xarici işlər nazirləri Ararat Mirzoyan və Ceyhun Bayramovun 2022-ci il iyulun 16-da Tbilisidə baş tutan görüşü olub. Bu ilin oktyabrında Tbilisidə keçirilən İpək Yolu Forumu çərçivəsində ilk dəfə olaraq Gürcüstan, Ermənistan və Azərbaycan baş nazirlərinin üçtərəfli görüşü baş tutub. (Tass)