Qazaxıstan Respublikasının elm və ali təhsil naziri Sayasat Nurbek və Azərbaycanın bu ölkədəki səfiri Ağalar Atamoğlanov ali təhsilin beynəlmiləl səviyyədə təşviqi, elm və ali təhsil sahəsində ikitərəfli əməkdaşlığın inkişafı və akademik əlaqələrin dərinləşdirilməsi məsələlərini müzakirə ediblər.
AZƏRTAC Qazaxıstan Respublikasının Elm və Ali Təhsil Nazirliyinə istinadla xəbər verir ki, “EasyDanismanlik” şirkətinin təsisçisi və nümayəndə heyətinin üzvlərinin də qatıldığı görüşdə tərəflər tələbələr və müəllim heyəti üçün akademik mobilliyin inkişafı, birgə təhsil proqramlarının həyata keçirilməsi, beynəlxalq tərəfdaşlığın genişləndirilməsi və xarici vətəndaşların Qazaxıstanın ali və aspirantura təhsili müəssisələrində təhsilə cəlb edilməsi ilə bağlı fikir mübadiləsi aparıblar.
Bundan əlavə, ən yaxşı beynəlxalq təcrübələrin tətbiqinə, təhsil xidmətlərinin ixrac potensialının artırılmasına və beynəlxalq təhsil məkanında əməkdaşlığın gücləndirilməsinə xüsusi diqqət yetirilib.
Görüşdən sonra tərəflər qarşılıqlı faydalı əməkdaşlığın daha da inkişaf etdirilməsinə və ali təhsilin beynəlmiləl səviyyədə təşviqinə sadiq olduqlarını bir daha təsdiqləyiblər.