Birləşmiş Ştatlar administrasiyası yaxın vaxtlarda İsrailə əlavə hərbi dəstək üçün şərtlər qoymayacaq. Bu barədə “Politico” qəzeti adı açıqlanmayan üç amerikalı məmura istinadən məlumat yayıb.
Amerika administrasiyasının nümayəndələrindən biri nəşrə bildirib ki, “bu, indi nəzərdən keçirdiyimiz şey deyil”. Qəzet qeyd edir ki, Ağ Evin bu mövqeyi Baydenlə onun özünün Demokratik Partiyasının üzvləri arasında toqquşmalara səbəb ola bilər. Onun bəzi tərəfdarları İsrailə hərbi yardıma məhdudiyyətlərin qoyulmasının vacibliyini bəyan edirlər.
Noyabrın 24-də Bayden, Massaçusets ştatının Atlantik sahillərində yerləşən Nantucket kurort adasında mətbuata danışarkən, partiya yoldaşlarının İsrailə hərbi yardım göstərmək üçün şərtlər irəli sürmək təklifini “yaxşı fikir” adlandırıb. Rəsmilərin sözlərinə görə, Bayden ətrafındakılara İsrailin baş nazirinin çətin tərəfdaş olmasından özəl olaraq şikayət edir.
Qəzetin həmsöhbətlərindən biri qeyd edib ki, belə bir bəyanat strateji qeyri-müəyyənlik yaradır və Vaşinqtonun gələcəkdə İsrailə yardım qərarına yenidən baxa biləcəyini göstərir. Onun sözlərinə görə, bu, Netanyahunu nəzarətdə saxlayacaq. (Tass)