ABŞ və İran gizli əlaqələrin gündəliyini Qırmızı dəniz və Bab əl-Məndəb boğazındakı vəziyyətlə bağlı müzakirələri də əhatə edəcək şəkildə genişləndiriblər. Bu barədə BƏƏ-nin ” The National” qəzeti Pakistan mənbəsinə istinadən məlumat yayıb.
Qəzet mənbəyə istinadən bildirib ki, “Pərdəarxası danışıqların daha bir mərhələsi baş verir və yalnız Hörmüz boğazı və Qırmızı dənizə yönəlib”. Mənbənin sözlərinə görə, Vaşinqton bu iki suda gəmilərə hücumlara son qoyacaq bir həll yolu axtarır. Bunun müqabilində Tehran iyun ayı memorandumunda vəd edilmiş güzəştlərə, o cümlədən neft satışına və sanksiyaların tədricən yumşaldılmasına nail olmağa çalışır. Qəzet əvvəllər qeyd etmişdi ki, Yəmənin Ənsar Allah hərəkatından olan husi üsyançıları Səudiyyə Ərəbistanına qarşı blokada elan etdikdən sonra Bab əl-Məndəb boğazında gəmiçilik 56% azalıb.
“The National” qəzetinin məlumatına görə, ötən ilin sentyabr ayında Ər-Riyadla imzalanmış qarşılıqlı müdafiə müqaviləsi sayəsində Pakistanın bu prosesdəki rolu vasitəçilikdən kənara çıxıb. Qəzetin mənbəsi vurğulayıb ki, Səudiyyə Ərəbistanı Qırmızı dəniz gəmiçiliyi məsələsinin həllində kömək istəsə, Pakistan “kənarda qala bilməyəcək”, hətta krallığın maraqlarını qorumaq üçün Pakistan gəmilərinin Qırmızı dənizə göndərilməsi tələb olunsa belə. (Tass)