Böyük Britaniyanın Ətraf Mühit, Ərzaq və Kənd Təsərrüfatı Nazirliyi (DEFA) yayın dördüncü isti dalğası ilə əlaqədar olaraq İngiltərənin yarısında quraqlıq elan edildiyini açıqlayıb.
Devon, Dorset, Qərbi Midlends, Kornuoll, Somerset, Uiltşir, Hertfordşir, Hempşir, Şərqi İngiltərə, Temza Vadisi, London, Uayt Adası və cənubi Qlosterşir qraflıqları üçün quraqlıq xəbərdarlığı edilib. Agentliyin açıqlamasında deyilir: “Mərkəzi, şərqi və cənubi İngiltərənin əhəmiyyətli hissələri hazırda qəfil quraqlıq yaşayır – bu vəziyyət son dərəcə az yağış və yüksək temperaturun kombinasiyası səbəbindən sürətlə inkişaf edir. Çayların səviyyəsi aşağı düşür, fermerlər məhsulu erkən yığmağa məcbur edilir, meşə yanğınları riski artır və milyonlarla insan su məhdudiyyətləri altında yaşayır”.
Nazirlik qeyd edib ki, iyul ayında “gözlənilən yağışın yalnız 7%-i, İngiltərənin cənubunda isə cəmi 1%-i” olub. “Yaxın gələcəkdə əhəmiyyətli yağış gözlənilmir. Üç istilik dalğası, o cümlədən ardıcıl 12 gün ərzində temperaturun 30 dərəcə Selsidən yuxarı olduğu dövr su ehtiyatlarını tükəndirib. Daha yüksək temperatur həmçinin torpaqdan və bitki örtüyündən nəmin buxarlanmasına səbəb olur və meşə yanğınları riskini artırır”, – deyə bəyanatda vurğulanıb.
Nazirliyin açıqlaması Böyük Britaniyada dördqat isti hava dalğasının baş verdiyi bir vaxtda verilib. Çərşənbə günü temperaturun 35 dərəcə Selsiyə çatacağı və “son dərəcə şiddətli” meşə yanğınları təhlükəsi yaradacağı gözlənilir. Böyük Britaniya Meteorologiya İdarəsinin məlumatına görə, iyul ayında temperatur orta səviyyədən üç dərəcə yüksək olub.