Türkiyənin Yalova şəhərində XXII Beynəlxalq Qafqaz Rəqs və Musiqi Festivalı başlayıb.
AZƏRTAC xəbər verir ki, “Qafqazda və bütün dünyada sülh naminə” şüarı altında təşkil olunan tədbirdə Azərbaycan “Suvar” Ləzgi Xalq Mahnı və Rəqs Ansamblı tərəfindən təmsil olunur.
Festivalda Azərbaycanla yanaşı, Adıge, Dağıstan, Gürcüstan, Kabarda Balkariya və Şimali Osetiyadan, ümumilikdə, 350-dən çox sənətçi iştirak edir.
Tədbirin əsas məqsədi Qafqaz xalqlarının zəngin mədəni irsinin qorunması, xalqlar arasında dostluq münasibətlərinin möhkəmləndirilməsi və mədəniyyətlərarası dialoqun inkişafına töhfə verməkdir.
Festivalın avqustun 19-da təşkil edilən açılış mərasimində “Suvar” Ləzgi Xalq Mahnı və Rəqs Ansamblı rəngarəng musiqi və rəqs proqramı ilə çıxış edib. Konsertdə “Odlar yurdu” rəqsi və müğənni Elvina Heydərovanın ifasında “Şirindil“ mahnısı təqdim olunub.
Ansamblın festival repertuarına “Şadvilin suvar” („Bayram sevinci“), “Görüş”, “Çəmənlik”, “Naz eləmə”, “İrs” və “Ləzginka avazı” rəqsləri, həmçinin Cəvahir Abdulovanın ifasında “Kanidi” („Sevdiyim“), “Sarı gəlin”, “Azərbaycan”, Elvina Heydərovanın təqdimatında isə “Perizada”, “Qara dəniz” və “İyerval” (Gözəllik”) mahnıları daxildir.
Təmsilçilərimiz avqustun 20-də Türkiyənin Balıkesir vilayətində konsert proqramı ilə tamaşaçıların qarşısına çıxacaq, avqustun 21-də keçiriləcək Qala konsertində geniş proqramla çıxış edəcəklər.