Amerikanın Budapeştdəki səfiri David Pressman çərşənbə axşamı Macarıstan hökumətini ittifaq üzvlərinin ondan uzaqlaşdığı bir vaxtda NATO müttəfiqlərinin maraqlarına məhəl qoymadığına və Rusiya ilə əlaqələri gücləndirdiyinə görə kəskin tənqid edib. Səfir bu barədə Amerika Ticarət Palatasında Macarıstana investisiya yatıran ABŞ şirkətlərinə açıqlama verib. Onun sözlərni Reuters agentliyi sitat gətirib.
Pressmanın sözlərinə görə, Macarıstan Avropa İttifaqının və NATO-nun üzvü kimi çiçəklənib, şirkətlərə öz ərazisində uğurlu iş aparmağa imkan verib. “Bu gün biz getdikcə daha çox NATO müttəfiqlərinə güvənən, lakin eyni zamanda bu müttəfiqlərin və bizim müttəfiqlərimizin maraqlarına, o cümlədən Avropadakı müharibə zamanı etinasızlıq göstərməkdə özünü rahat hiss edən bir müttəfiq görürük” deyə diplomat bildirib.
“Baş nazir [Viktor Orban] [Rusiya Prezidenti Vladimir] Putini dəstəklədikdə və onun hökuməti qonşusu Ukraynaya son dərəcə ehtiyac duyulan yardımı dayandırmaqla hədələdikdə, müstəqil media və vətəndaş cəmiyyəti strukturları təhqiqat və hücuma məruz qaldıqda, bu laqeydlik aydın görünür” səfir bildirib.
Pressman Macarıstanın siyasi partiyaların xaricdən maliyyələşdirilməsini qadağan edən qanun layihəsini yenidən tənqid edib. Onun sözlərinə görə, təşəbbüs “məhdud və nəzarətsiz istintaq səlahiyyətləri ilə silahlanmış yeni daxili təhlükəsizlik departamentinin” yaradılmasına gətirib çıxaracaq. (Tass)