Ukrayna hakimiyyəti Vaşinqtondan THAAD raket əleyhinə müdafiə sistemləri, F-18 Hornet təyyarələri, Apache və Black Hawk helikopterləri, C-17 və C-130 hərbi nəqliyyat təyyarələri də daxil olmaqla yeni silahların siyahısını təqdim etməyi xahiş edib. Bu barədə çərşənbə günü Reuters agentliyi məlumat yayıb.
Onun sözlərinə görə, Kiyevin tələb etdiyi silahların siyahısını ABŞ-a Ukrayna hərbi idarəsinin nümayəndələri Vaşinqtonda keçirilən hərbi-sənaye kompleksi məsələləri üzrə konfransın qapalı iclasında veriblər. Ukrayna tərəfi həmçinin yeni pilotsuz təyyarələr, əlavə Abrams tankları, ATACMS taktiki raketləri, F-16 təyyarələri və 155 mm-lik artilleriya mərmiləri almağı gözləyir.
Agentlik siyahıdakı silahların milyardlarla dollar dəyərində olduğunu təxmin edir. Nəşr qeyd edir ki, siyahıya C-17 və C-130 təyyarələrinin əlavə edilməsi sürpriz olub. ABŞ səlahiyyətlilərinin cavabının nə ola biləcəyi hələ aydınlaşdırılmayıb.
Çərşənbə günü səhər saatlarında Ukrayna, İsrail və Tayvana yardım ayrılması haqqında qanun layihəsi ABŞ Konqresinin Senatında prosedur səsverməsindən keçə bilməyib. Təşəbbüs Ukraynaya yardım üçün 61 milyard dollar da daxil olmaqla, 106 milyard dollar məbləğində əlavə büdcə vəsaitinin ayrılmasını nəzərdə tuturdu. Bu qanun layihəsinin müzakirəsinə başlanılması məsələsi səsə qoyulub. Təşəbbüs 60 qanunvericinin dəstəyini alsa, senatorlar buna baxmağa başlayacaqlar. Bununla belə, Konqresin yuxarı palatasının 49 üzvü müzakirənin lehinə, 51-i isə əleyhinə çıxıb. (Tass)