Sumqayıt Dövlət Dram Teatrında Abşeron-Xızı Regional Təhsil İdarəsinin təşkilatçılığı ilə Ümummilli Lider Heydər Əliyevin 100 illik yubileyinə həsr olunmuş “Tarixin uca zirvəsi” adlı tədbir keçirilib. Tədbirdə Sumqayıt Şəhər İcra Hakimiyyətinin, Abşeron-Xızı Regional Təhsil İdarəsinin rəhbərliyi və təhsil ictimaiyyətinin nümayəndələri iştirak ediblər.
AZƏRTAC xəbər verir ki, əvvəlcə iştirakçılar teatrın foyesində təşkil olunan şagirdlərin əl işi ilə tanış olublar.
Sumqayıt Şəhər İcra Hakimiyyətinin başçısı Zakir Fərəcov və Abşeron-Xızı Regional Təhsil İdarəsinin müdiri İlhamə Abdullayeva Ulu Öndər Heydər Əliyevin həyat yoluna nəzər salıb, müstəqil Azərbaycanın memarının ölkənin inkişafı yolunda əvəzsiz xidmətlərindən danışıblar.
Vurğulanıb ki, Sumqayıt Ümummilli Liderin Azərbaycana rəhbərlik etdiyi illərdə ölkəmizin aparıcı sənaye mərkəzindən birinə çevrilib. Heydər Əliyev ölkəyə rəhbərlik etdiyi illərdə Sumqayıt şəhərinə 16 dəfə səfər edib. Bu səfərlərin hər biri əlamətdar hadisələrlə yadda qalıb.
Qeyd olunub ki, Prezident İlham Əliyevin rəhbərliyi ilə həyata keçirilən uğurlu daxili siyasət kursu sayəsində Sumqayıt şəhəri sürətlə inkişaf edir. Dövlət başçısının Sumqayıt şəhərinə hər gəlişi, təməlqoyma mərasimlərində iştirakı, dövlət və özəl müəssisələrin açılışını etməsi, təhsil, səhiyyə, mədəniyyət ocaqların istifadəyə verilməsi şəhərin tarixində əhəmiyyətli hadisəyə çevrilir.
Tədbir məktəblilərin təşkil etdiyi geniş və rəngarəng bədii proqramla davam edib.