“Qusar-1” kiçik su elektrik stansiyasında istismara verildiyi gündən cari il dekabrın 1-dək 3,1 milyon kilovat-saat “yaşıl” elektrik enerjisi istehsal olunub.
Energetika Nazirliyindən AZƏRTAC-a bildirilib ki, açılışı 2012-ci il dekabrın 20-də olan stansiyada 2021-ci ildə 0,26 milyon kilovat-saat, 2022-ci ildə 0,27 milyon kilovat-saat, 2023-cü ilin 11 ayında isə 0,22 milyon kilovat-saat elektrik enerjisi istehsal olunub.
Hər biri 0,32 MVt olan 3 ədəd hidroaqreqatdan ibarət olan basqılı derivasiya tipli su elektrik stansiyasının ümumi qoyuluş gücü 0,96 MVt-dır.
Qeyd edək ki, kiçik SES-lər ekoloji cəhətdən təmiz elektrik enerjisi istehsalı müəssisələri hesab olunur. Burada yanma prosesi getmədiyindən ətraf mühitə istixana effekti yaradan qazlar atılmır.