Elm və Təhsil Nazirliyi Kataliz və Qeyri-üzvi Kimya İnstitutunun Katalizatorların hazırlanması laboratoriyasının elmi işçisi, Gənc Alim və Mütəxəssislər Şurasının sədr müavini Günel Əzimova Almaniyanın Rostok şəhərində Leybnits Kataliz İnstitutu elmi-tədqiqat mərkəzində (LIKAT) elmi ezamiyyətdə olub.
Bu barədə AZƏRTAC-a institutdan məlumat verilib.
G.Əzimova LIKAT-da Heterogen katalitik proseslər şöbəsində qrafin əsaslı metal əlavə olunmuş katalizatorların hazırlanmasında iştirak edib, qaz fazada davamlı axınla ammonyakın parçalanması reaksiyasına dair təcrübələr yerinə yetirib. Gənc alim laboratoriyada təcrübə zamanı heterogen katalizatorların hazırlanması üçün müxtəlif metodlardan istifadə edərək onların optimal işləmə şəraitini araşdırıb. O, həmçinin apardığı tədqiqat işinə dair təqdimatla çıxış edib.