Şamaxı Yaradıcılıq Mərkəzində Ulu Öndər Heydər Əliyevin şəxsi fotoqrafı olmuş Rafiq Bağırovun fotolarından və “Qeyd-Sosial Maarifləndirmə” İctimai Birliyinin təqdim etdiyi fotoxalçalardan ibarət “Heydər Əliyev və mədəniyyət” adlı sərgi təşkil olunub.
Ulu Öndərin 100 illiyi çərçivəsində Dağlıq Şirvan Regional Mədəniyyət İdarəsinin, Şamaxı Rayon İcra Hakimiyyətinin və Yeni Azərbaycan Partiyası Şamaxı rayon təşkilatının təşkilatçılığı ilə keçirilən tədbirdə mədəniyyət, təhsil və ictimaiyyət nümayəndələri iştirak ediblər.
AZƏRTAC xəbər verir ki, tədbirdə çıxış edən Şamaxı Rayon İcra Hakimiyyətinin başçısı Tahir Məmmədov, YAP Şamaxı rayon təşkilatının sədri Tural Qasımlı, “Qeyd-Sosial Maarifləndirmə” İctimai Birliyinin sədri Tural Nurməmmədov, Əməkdar jurnalist, “Azad Azərbaycan” Teleradio Şirkətinin bədii şurasının sədri Etibar Babayev və Ulu Öndər Heydər Əliyevin şəxsi fotoqrafı olmuş, sərginin müəllifi Rafiq Bağırov Heydər Əliyevin həyat və fəaliyyəti, onun mədəniyyətimizin inkişafı və təbliği istiqamətində gördüyü işlərdən söhbət açıblar.
Daha sonra sərgidə nümayiş olunan, əsasən Ümummilli Lider Heydər Əliyevin mədəniyyət və incəsənətimizə göstərdiyi diqqət və qayğını özündə ehtiva edən foto və fotoxalçalara baxış keçirilib.