Cari ilin 11 ayında qeydiyyata alınan mülkiyyət hüququnun sayı ötən ilin müvafiq dövrü ilə müqayisədə 31,4 faiz çoxdur.
AZƏRTAC Əmlak Məsələləri Dövlət Xidmətinə istinadla xəbər verir ki, həyata keçirilən daşınmaz əmlakın dövlət qeydiyyatı sahəsində müsbət dinamika müşahidə olunur. Belə ki, 2023-cü ilin yanvar-noyabr ayları ərzində daşınmaz əmlak üzərində 436 min 533 mülkiyyət hüququnun qeydiyyatı aparılıb. Bu, 2022-ci ilin eyni dövrü ilə müqayisədə 31,4 faiz çoxdur. 2023-cü ilin 11 ayı üzrə göstəricinin 67 min 968-si (15,5 faiz) ilkin, 368 min 565-i (84,5 faiz) isə təkrar qeydiyyatın payına düşür.
Bu ilin yanvar-noyabr ayları ərzində fərdi yaşayış və bağ evi üzərində 49 min 328, mənzil üzərində 86 min 545, torpaq sahəsi üzərində 290 min 306, qeyri-yaşayış binası üzərində 2904, qeyri-yaşayış sahəsi üzərində 6689, əmlak kompleksi üzərində 673, çoxmərtəbəli yaşayış binası üzərində isə 88 mülkiyyət hüququnun qeydiyyatı aparılıb. Bu dövrdə dövlət qeydiyyatına alınan daşınmaz əmlakların 91min 29-u Bakının, qalanı isə bölgələrin payına düşür.
Cari ilin yanvar-noyabr ayları ərzində 347 min 348 texniki pasport tərtib edilib. Bu, ötən ilin eyni dövrü ilə müqayisədə 32,2 faiz çoxdur. 2023-cü ilin 11 ayı ərzində qeydiyyata alınan ipoteka müqavilələrinin sayı əvvəlki ilin müvafiq dövrünə nisbətən 14,3 faiz artaraq 74 min 281 təşkil edib.