Qara Qarayev adına Mərkəzi İncəsənət Məktəbinin rəssamlıq ixtisası üzrə müəllimi, Azərbaycan Rəssamlar İttifaqının üzvü Nigar Şıxəliyevanın təşkilatçılığı ilə Xətai Sənət Mərkəzində “Nağıllar aləmində Yeni il” adlı sərgi keçirilib.
AZƏRTAC xəbər verir ki, məktəbin nəzəriyyə ixtisası üzrə müəllimi, musiqişünas Leyla Həsənova tədbiri açıq elan edərək, xoreoqrafiya və rəssamlıq şöbəsinin şagirdlərinin əl işləri barədə ətraflı məlumat verib.
Sərgidə məktəbin istedadlı şagirdlərinin rəngarəng əl işləri nümayiş olunub.
Sonra Xalq çalğı alətləri şöbəsinin şagirdlərinin, “Buta” qanun ansamblı, “Səbinə” rəqs qrupu və xanəndə və vokal şöbəsinin şagirdlərinin ifasında bir-birindən gözəl ifalar səslənib.
Tədbirin sonunda Qara Qarayev adına Mərkəzi İncəsənət Məktəbinin direktoru, Əməkdar artist, dosent Əziz Qarayusifli şagirdlərə diplomlar və hədiyyələr təqdim edib.