Dekabrın 25-də 3 nömrəli Uşaq-Gənclər İnkişaf Mərkəzində 2023-cü ilin yekunlarına həsr olunan “Bizim uğurlarımız” adlı tədbir keçirilib.
AZƏRTAC xəbər verir ki, tədbir respublika və beynəlxalq müsabiqələrdə mərkəzin qalib olan istedadlı uşaqlarının təltif edilməsinə həsr olunub.
Tədbirdə məlumat verilib ki, il ərzində mərkəzin “Teatr”, “Rəsm”, “Vokal”, “Rəqs” və “Əl işləri” dərnəklərinin üzvləri müxtəlif tədbirlərdə fəal iştirak edərək uğur qazanıblar. Mərkəzin istedadlı yetirmələri Türkiyə, Polşa, Çin, Belarus və Qazaxıstanda keçirilən beynəlxalq müsabiqə və tədbirlərdə qalibiyyət əldə edərək 44 diplom, 58 sertifikat və 8 fəxri fərmana layiq görülüblər.
Çıxış edənlər dərnək üzvlərinin uğurlarından danışıb, onlara təhsillərində və gələcək müsabiqələrdə uğurlar arzulayıblar.
Sonra beynəlxalq müsabiqə və tədbirlərdə qalib olan dərnək üzvlərinə diplom, sertifikat, fəxri fərman və digər mükafatlar təqdim olunub.
Mərkəzin istedadlı dərnək üzvlərinın ifasında rəngarəng mahnı və rəqs nümunələri alqışlarla qarşılanıb.