STEAM İnnovasiya Mərkəzində Milli Məclisin deputatları ilə görüş keçirilib.
Bu barədə AZƏRTAC-a Elm və Təhsil Nazirliyindən bildirilib. Görüşdə Elm və Təhsil Nazirliyinin Aparat rəhbəri Mətin Kərimli, Elm və Ali Təhsil üzrə Dövlət Agentliyinin direktoru Ülkər Səttarova, Məktəbəqədər və Ümumi Təhsil üzrə Dövlət Agentliyinin direktoru Eşqi Bağırov, Peşə Təhsili üzrə Dövlət Agentliyinin direktoru Ceyhun Kərəmov, həmçinin nazirliyin müvafiq struktur bölmə rəhbərləri iştirak ediblər.
Görüş zamanı nazirliyin Vətəndaşlara xidmət və sənədlərlə iş şöbəsinin müdiri Rəşad Xanlarov quruma daxil olan vətəndaş müraciətləri barədə təqdimat edib. Daha sonra nazirliyin yeni yaradılan agentlikləri və onların fəaliyyət istiqamətləri barədə məlumat verilib.
Deputatlar isə təmsil etdikləri regionlar üzrə vətəndaşların daha çox müraciət etdikləri mövzulardan danışıb, rəy və təkliflərini bildiriblər.
Agentliklərin rəhbərləri deputatların səsləndirdikləri fikir və istiqamətlər üzrə sualları cavablandırıblar.
Sonda bu cür görüşlərin davam etdirilməsi qərara alınıb.