Şimali Koreya lideri Kim Çen In dron istehsalının vacibliyinə işarə edərək, nüvə arsenalının artırılmasına göstəriş verib. Bu barədə Koreya Mərkəzi Xəbər Agentliyi məlumat yayıb.
Agentliyin məlumatına görə, Kim Çen In vurğulayıb ki, 2024-cü ildə nüvə silahının istehsalı planının həyata keçirilməsi üçün “inadkar mübarizə aparılacaq” və bunun ardıcıl olaraq artırılmasını mümkün etmək üçün “etibarlı baza yaradılacaq”.
KXDR lideri “gəmiqayırmada ikinci inqilaba” çağırıb və qeyd edib ki, sualtı və yerüstü donanmanı inkişaf etdirməklə “müdafiə qüvvələrinin inkişafı üzrə beş vəzifəni” tez bir zamanda yerinə yetirmək lazımdır.
Kim Çen In müasir müharibənin xüsusiyyətlərinə uyğun olaraq bütün növ pilotsuz uçuş aparatlarının və güclü elektron müharibə sistemlərinin hazırlanması və istehsalının vacibliyini vurğulayıb. Koreya Fəhlə Partiyasının baş katibi onun Mərkəzi Komitəsinin plenumunda çıxış edib. (Tass)