Ukraynanın baş naziri Denis Şmıqal fevral ayında Tokioda iqtisadi inkişaf və dirçəliş üzrə ikitərəfli konfransın keçiriləcəyi zaman Yaponiyaya səfər edə bilər. Ukraynanın Yaponiyadakı səfirliyi hökumət başçısının səfərinə hazırlaşır. Bu barədə diplomatik nümayəndəliyin rəhbəri Sergey Korsunski “Qlavkom”a müsahibəsində bildirib.
“2024-cü il fevralın 19-da Ukraynanın baş naziri Tokioya səfər edəcək və Ukraynanın bərpası ilə bağlı ikitərəfli konfrans keçiriləcək. Bu, bir nömrəli tapşırıqdır”, – o, Ukraynanın Yaponiyadakı səfirliyinin əsas vəzifələri ilə bağlı sualı cavablandırıb.
2023-cü ilin noyabrında Yaponiya Xarici İşlər Nazirliyi Yaponiyanın baş naziri Fumio Kişida və Ukrayna prezidenti Vladimir Zelenskinin telefon danışığında 2024-cü il fevralın 19-da Tokioda Ukraynanın bərpası ilə bağlı ikitərəfli konfransın keçirilməsi barədə razılığa gəldiyini bildirmişdi. Kişida vurğulayıb ki, Yaponiya hökuməti Ukraynaya ölkənin infrastrukturunun və iqtisadiyyatının bərpası ilə bağlı məsələlərdə görünməmiş yardım göstərməyi planlaşdırır.
Bundan əvvəl Yaponiya KİV-i məlumat vermişdi ki, Yaponiya hökuməti Ukraynanın bərpasına dəstək çərçivəsində Kiyevə teletibb, ağıllı kənd təsərrüfatı, eləcə də bərpa olunan enerji mənbələrinin istehsalı və istifadəsi sahəsində qabaqcıl texnologiyalar ötürmək niyyətindədir. Yaponiya hökuməti indiyədək Ukraynaya 7,6 milyard dollardan çox məbləğdə humanitar, ərzaq, maliyyə və digər yardımlar göstərib. (Tass)