Şiə Hizbullah partiyasının silahlı qüvvələri 100 km-dən çox uzanan cəbhədə İsrail ordusuna qarşı hərbi əməliyyatlar aparır. Bunu partiyanın lideri Şeyx Həsən Nəsrullah Beyrutda keçirilən mitinq iştirakçılarına televiziya ilə müraciətində deyib. Onun sözlərinə görə, İsrail şimal cəbhəsində 120 mindən çox əsgər cəmləyib.
“Döyüşçülərimiz oktyabrın 8-dən Livan-İsrail sərhədində 670 əməliyyat keçirərək düşmənin 494 hədəfini vurublar”, – deyən şiə siyasətçi: “Üç ay ərzində İsrailin şimalındakı 8 xəstəxanada 2 mindən çox hərbi qulluqçuya yardım göstərilib, lakin İsrail komandanlığı şimal cəbhəsindəki itkilərin sayını gizlədir”. Onun fikrincə, bu, qoşunların mənəviyyatını pozmamaq üçün qəsdən edilir.
Nəsrullah qeyd edib ki, İsrail ilk dəfə olaraq Livanla sərhəddə bufer zona yaradaraq, ölkənin şimalındakı yaşayış məntəqələrindən 230 mindən çox sakini təxliyə edib. O, Hizbullahın sərhəd bölgələrində düşmənə qarşı döyüş qaydaları tətbiq etdiyini və mülki insanları hədəfə almaqdan çəkindiyini iddia edib. (Tass)